പ്രശസ്തമായ ‘വിനീ-ദി-പൂ’ (Winnie-the-Pooh) കഥാപാത്രത്തിന്‍റെ നൂറാം വാർഷിക ദിനത്തിൽ കാലിഫോർണിയയിലെ ഒരു ലൈബ്രറിയിൽ കരടിയുടെ കൗതുകകരമായ സന്ദർശനം. തുറക്കുന്നതിന് മുൻപ് മാമ്മത്ത് ലേക്സ് ലൈബ്രറിയിൽ പ്രവേശിച്ച കറുത്ത കരടിയാണ് സ്റ്റാഫുകളുടെ ലഘുഭക്ഷണങ്ങളും തേനും ആസ്വദിച്ചു കവർന്നത്.
മോണോ കൗണ്ടി ഫ്രീ ലൈബ്രറീസിന്‍റെ (Mono County Free Libraries) ഫേസ്ബുക്ക് പേജിലൂടെയാണ് അപ്രതീക്ഷിത അതിഥിയുടെ സിസിടിവി ദൃശ്യങ്ങൾ പുറത്തുവിട്ടത്. രാവിലെ 6:10ഓടെ ലൈബ്രറിയിൽ എത്തിയ കരടി, ആളൊഴിഞ്ഞ സ്ഥലത്തുകൂടി ശാന്തമായി നടന്ന് പരിശോധന നടത്തുന്നതായി വീഡിയോയിൽ കാണാം. രാവിലെ 10 മണിക്ക് മാത്രമാണ് ലൈബ്രറി പൊതുജനങ്ങൾക്കായി തുറക്കുന്നത്.
ലൈബ്രറി ഡയറക്ടർ ജോസഫ് ബോപ്പിന്‍റെ വിവരങ്ങൾ അനുസരിച്ച്, സ്റ്റാഫുകൾക്കായി കരുതിയിരുന്ന പീനട്ട് ബട്ടർ, പീച്ച് കപ്പുകൾ, കുക്കികൾ, ഒപ്പം ഏറ്റവും കൗതുകകരമായ ഒരു ജാർ തേൻ എന്നിവയാണ് കരടി അകത്താക്കിയത്. വിശപ്പ് മാറിയ ശേഷം പുതിയ പുസ്തകങ്ങളും റെഫറൻസ് ഡെസ്ക്കും പരിശോധിച്ച കരടി, യാതൊരുവിധ കേടുപാടുകളും വരുത്താതെ തന്നെ അവിടെനിന്നും പുറത്തുപോവുകയും ചെയ്തു. തേൻ ജാർ മാത്രം നഷ്ടപ്പെട്ടതായി ലൈബ്രറി അധികൃതർ വ്യക്തമാക്കി.
ഒക്ടോബർ 14, 1926ൽ പ്രസിദ്ധീകരിച്ച ‘വിനീ-ദി-പൂ’ പുസ്തകത്തിന്‍റെ ശതാബ്ദി ദിനത്തിൽ തന്നെ യഥാർഥ കരടി തേനും തേടി എത്തിയത് സമൂഹമാധ്യമങ്ങളിൽ വലിയ കൗതുകത്തിനാണ് വഴിവെച്ചിരിക്കുന്നത്. ലൈബ്രറികളിൽ മനുഷ്യർക്ക് മാത്രമേ പ്രവേശനമുള്ളൂ എന്നും, വന്യമൃഗങ്ങളായ കരടികളോട് അകലം പാലിക്കണമെന്നും അധികൃതർ ജനങ്ങൾക്ക് മുന്നറിയിപ്പ് നൽകിയിട്ടുണ്ട്.
